Austevoll-selskapet Servicebåt får levert ein nødslaktebåt i desember og har no bestilt nok eit fartøy av same type.
Servicebåt sin patenterte teknologi på automatisk sortering av fisk skal nyttast i prosessfartøyet «Elax Mist». Den er under bygging for Elax AS ved Fitjar Mekaniske Verkstad AS (FMV).
- Konseptet med maskinell sortering er positivt mottatt i marknaden og Servicebåt kunngjer i dag at selskapet kontraherer ennå eit prosessfartøy av typen HMFV design P28 med lastekapasitet på 150 tonn frå FMV, skrive selskapet i ei pressemelding.
Servicebåt har eit tett samarbeid med Elax om bygging og drift av det aller første fartøyet med denne teknologien om bord. Når fartøyet «Elax Mist» vert levert i desember i år, skal det rett i oppdrag for ei gruppe oppdrettarar på Vestlandet.
- Servicebåt ser stadig aukande interesse for slike prosessfartøy og vil med denne nye kontraheringa kunne tilby ei dobling av kapasiteten for beredskaps- og bløggefartøy med Elax-teknologi om bord innan hausten 2020, skriv selskapet.
Metoden går ut på automatisk utsortering av skada fisk som ikkje har rett kvalitetsnivå for å nyttast til humant konsum. Sorteringa vert utført på grunnlag av fiskens respons på elektrisk stimuli under bedøvingsprosessen før avliving.
