11 av 18 i mannskapet på line- og garnfartøyet «Loran» har testa positivt for korona i løpet av dei to siste vekene, ifølge NRK. Det var snakk om hurtigtestar, og måndag kveld skal det vere seks personar om bord som er smitta. Fem av dei testa negativt.
Dei som er smitta skal ha milde eller ingen symptom.
Reiarlaget ser ikkje behov for å avbryte turen.
– Vi har heile tida fått og følgt råd frå smittesporingsteamet i Giske kommune og sjømannslegen. Dei smitta har hatt milde symptom og vore sjuke berre ein dag eller to. Dei har hatt lite feber, seier Ståle Otto Dyb, reiar og skipper om bord, i ei pressemelding frå Giske kommune.
Båten er på torskefiske ved Grønland. Dersom nokon skulle bli sjuke, er båten litt over eitt døgn unna Reykjavík.
– Ingen har uttrykt at dei er engstelege, eller har sagt at dei vil til land. Heldigvis er vi eit ungt mannskap, seier styrmann Tonje Dyb til NRK.
