Tysdag deltar fiskeri- og havministeren på konferansen Arctic Frontiers og årsmøtet til Råfisklaget i Tromsø. Det melder Nærings- og fiskeridepartementet i ei pressemelding måndag.
– Eg ser fram til å møte EUs fiskerikommissær Virginijus Sinkevičius på Arctic Frontiers. Tromsø blir faktisk den første staden vi møter kvarandre fysisk, seier fiskeri- og havminister Bjørnar Skjæran i ei pressemelding.
– Ein god samarbeidspartnar
Norge og EU kom førre veke til ei forståing om fiske i fiskevernsona ved Svalbard og i dei nordlege farvatna.
– Eg er glad for at vi no har fått på plass ei forståing. EU har vist at dei er ein nær og god samarbeidspartnar som meiner alvor når det gjeld berekraftig havforvaltning, seier Skjæran.
Han viser til at samtalane med EU-kommisjonen har vore produktive.
– I mitt møte med fiskerikommissæren vil eg også drøfte EU som marknad for norsk sjømat og stadfeste vårt gode forskingssamarbeid, seier fiskeriministeren.
Etter konferansen deltar statsråden på Råfisklagets årsmøte. Der skal han halde innlegg og ha ein samtale med Daniel Lauritzen, vinnaren av «Årets kvalitetsfiskar 2021», opplyser departementet i meldinga.
